Чăваш Республикин наци библиотеки Чăваш автономи облаçне йĕркеленĕренпе 100 çул çитнине халалласа «Литературăллă Чăваш Ен: ҫӗрҫуллӑхри чи килӗшнӗ кӗнеке» вулав референдумне ирттерет.

  Референдум тĕллевĕ наци литературин чи паха тĕслĕхĕсене палăртса анлă сарасси, вулакансен, вулавăшсен хастарлăхне ӳстересси. Ҫак тӗллевпех Муркаш районӗн тӗп библиотекинче «Чи килӗшнӗ чӑваш кӗнеке»литература сехечӗ иртрӗ.  

   Библиотекарьсем ҫĕрçуллăхри чи килĕшнĕ кĕнекешӗн сасăлама хистесе «Чăваш литературин ылтăн çÿпçи: вуламалли 100 кĕнеке» сайтпа паллаштарчӗҫ. Пухăма 18 ĕмĕр варринчен пуçласа 21 ĕмĕр таран тĕрлĕ жанрпа çырнă илемлĕ литература, популярлă ăслăлăх литератури кĕнĕ.

   Ачасем хаваспах «Чăваш литературин ылтăн çÿпçи: вуламалли 100 кĕнеке» кӗнеке выставкинчи кӗнекесене алӑра тытса пӑхрӗҫ. Паянхи куна малти вырӑнти кӗнекесем ҫинчен ыйтса пӗлчӗҫ. Александр Артемьевӑн «Салампи», Константин Ивановӑн «Нарспи» поэмӑпа, Леонид Агаговӑн «Ылтӑн вӑчӑра» кӗнекисемпе тӗплӗнрех паллашрӗҫ, буктрейлерсем пӑхса киленчӗҫ. «Кил илемӗ» кӗнекери «Ылтӑн ҫӗр» юмаха вуласа тишкерчӗҫ, тӑван ҫӗртен хакли нимӗн те ҫуккине палӑртрӗҫ.

   Ҫӗр ҫул хушшинче пирӗн тӑван ен ӳссе, мӑнаҫланса пычӗ, тӗрлӗ йывӑрлӑхсемпе кӗрешме пултарчӗ. Ачасене библиотекарьсем хатӗрленӗ Сӑр тата Хусан оборона рубежӗсене тунӑ ҫӗре хутшӑннисен паттӑрлӑхне халалланӑ ролик питӗ килешрӗ.

   Тӗл пулу вӗҫленсе пынӑ май ачасем смартфонсемпе усӑ курса чи килӗшнӗ кӗнекене суйларӗҫ.

Фоторепортаж